1. Kang wus mungkur sugengira/Tinimbalan wangsul ngarsanta Gusti/Pasamuan tansah emut/Kalih Nopember rinya/Sumawana suwene sacandra nutug/Memule kang sampun seda/Tinampia Swarga adi//
2. Sabda Dalem ri punika/Kang sinerat ana ing Injil Suci/Anggitan Yohanes Rasul/Pasal nem ayatira/Telu pitu nganti tekan patangpuluh/Paringan Dalem Hyang Rama/Kang tumanduk marang Mami//
3. Maring Aku ingkang prapta/Ora bakal Sunbuang aneng njawi/Saking Swarga Sun tumurun/Dudu karsa priyangga/Karsa Dalem ingkang sayekti angutus/Kabeh kang wus pinaringna/Haywa ilang tanpa lari//
4. Besuk ing akhiring jaman/Istingarah Suntangekke iku pasthi/Sapa wae ingkang weruh/Sarta ngandel Hyang Putra/Ndarbenana urip langgeng kang satuhu/Iku yekti katangekna/Aneng pungkasaning ari//
Sorblimbing, 2 Nopember 2019
Inspirasi: Yohanes 6:37-40
Ki Sandinama
