Dhandhanggula
1. Amemanis Nusantara nagri/
Kalihèwu sangalas warsanya/
Warsi démokrasi rané/
Sagung kawulanipun/
Anudinga sinten pangarsi/
Sartané wakilira/
Kanggé gangsal tahun/
Aja nganti padha éndha/
Mapan iku hak kuwajibanirèki/
Mèlu mangun negara//
2. Ana loro pasangan kalèki/
Jokowi Ma’ruf Amin gandhéngan/
Déné pasangan loroné/
Prabowo sartanipun/
Sandiaga caloné wakil/
Sapa pilihanira/
Merdika satuhu/
Lengna samadyaning nala/
Tatag tangguh tan kagodha iming-iming/
Wujud dana prabéya//
3. Tumapaké dhawah wulan April/
Arinipun kang kaping pitulas/
Rebo Pahing pasarané/
Aja ana kang kantun/
Kang sinerat dadi pamilih/
Iku tunggak sejarah/
Nusantara nengguh/
Nut angger-angger negara/
Sesantinira fox populi fox Dei/
Mugi kalis rubéda//
Sor Blimbing, 29012019
Ki Sandinama
