1. Adhang-adhang miyos dalem Gusti/Keuskupan Agung ing Semarang/Kanggo ngisi mangsa Adven/Iki panglimbangipun/Wong Katolik kang transformatif/Punika magepokan/Wolungpuluh tahun/Keuskupan Gung Semarang/Tanapi sareng lan Konggrès Ekaristi/Tahun Misi sadonya//
2. Wonten malih Serat Apostolik/Paus Benedictus ping limalas/Pèngetan satus tahuné/Nenggih Maximum Illud/Pepanggihan kang kaping siji/Enggal padha tangia/Wus caket rahayu/Gumregut sarta gumrégah/Kanthi ngrasuk sandangan pepadhang yekti/Mrih Sabda dadi nyata//
3. Pahemané ingkang kaping kalih/Datan mangro ati lan suwara/Bebarengan pepadhané/Sedaya guyup rukun/Mring sesami nadyan tan sami/Sareng mad-sinamadan/Mulyakké Hyang Agung/Dayané pangaribawa/Manjing ajèr tan kélangan jati dhiri/Nut kelakoné jaman//
4. Teguh sabar panglimbang kang katri/Tangguh tanggon lan wani tumindak/Makarya lan leladiné/Seratira Yakobus/Rawuh dalem sampun nyaketi/Tangguh tanggon lan tatag/Kaya Nabi Ayub/Nadyan titah tan sampurna/Kudu wani dadi seksi dalem Gusti/Nèng jagat pasrawungan//
5. Sira dadi kagungané Gusti/Kraton Dalem mrih saya sumebar/Sangsaya luhur asmané/Wantu-wantu ywa mingkuh/Yekti dadi utusan Gusti/Madyaning pasrawungan/Nèng bebrayan agung/Rinekasoa Hyang Ma Nasa/Katentreman tansah sinandhang salami/Mbabara kabungahan//
6. ANdelira hanyarkara wani/TONto saking kala kina-kina/SUprih langggeng budayané/PARandéné tan gaduk/NYObi ngidung namung tan èdi/MARdawa kajengira/TObat tan pinangguh/SAglugut pinara sapta/PARibasan aji godhong jati aking/JOthakna ya sumangga//
Inspirasi: Panduan Adven Lingkungan, 2019, Komisi Kateketik KAS
Sor Blimbing, Buda Kasih, 11122019Ki Sandinama
