Pangkur
- Éling yèn tan nyingkur dosa/
Kapireng saking Pedaleman Suci/
Dhawuh malaékat pitu/
Nyangking bokor mring donya/
Saking Gusti ingkang isiné bebendu/
Malaékat sigra budhal/
Mestu dhawuh dalem Gusti// - Sinuntak bokor kapisan/
Gya warata myang salumahing siti/
Janma nandhang korèng wudun/
Lara kagila-gila/
Tiyang ingkang manembah brahala nengguh/
Wujud tenger sato kewan/
Sinembah diaji-aji// - Kapindho bokor binuka/
Ing jaladri banyu gya dadi getih/
Kaya marusé wong lampus/
Pejah sato samodra/
Ora ana ingkang kalis sedayanipun/
Ngathang-athang dha kemambang/
Dadi bathang tanpa aji/ - Kang katelu ya siniram/
Tuking banyu sumebar kabèh kali/
Banyu kali dadi marus/
Bebenduné anyidra/
Para suci sarta nabi kang diutus/
Padha ngombéa ludira/
Gusti kuwasa lan adil// - Bokor malékat kapapat/
Isiné siniram pratanggapati/
Hambesmi tetiyangipun/
Ingkang nyenyamah Allah/
Nguman-uman Asma Dalem ingkang luhur/
Kang tuhu maha kuwasa/
Tan martobat lan nggetuni// - Nyuntak bokor kang kalima/
Mring dhamparing kraton beburonèki/
Sakala peteng kalimput/
Nggeget ilat lan lara/
Parandéné malah nyamah Gustinipun/
Marga gudhig krasa lara/
Ngono tan martobat bali// - Bokor ping nem ya sinuntak/
Madyèng kali Efrat sakala garing/
Dadi dalan para ratu/
Saka tanah brang wétan/
Sigra medal naga saking tutukipun/
Nabi palsu buronira/
Sétan telu roh ijajil// - Werdinipun kang kacetha/
Kang angimpun ratu salumah bumi/
Namung kanggo perang campuh/
Rawuh-Ku lir durjana/
Rahayua siyaga sandhanganipun/
Tan bakal lumaku wuda/
Ngadhepi ariné Gusti// - Bokor kapitu pungkasan/
Isinipun binuwang wonten langit/
Kapireng suwara nguwuh/
Saking Daleming Allah/
“Wis kelakon” nuli ana thathit gludhug/
Lindhu gedhé ngguncang jagat/
Kutha sigar tiga dadi// - Babel myang èngetanira/
Pinaringan tuwung dukané Gusti/
Ilang pulo gunung-gunung/
Udan ès lan prahara/
Ageng-ageng ès sadhacin awratipun/
Awit padha nyamah Allah/
Bebenduné nggegirisi// - Nyambi ngangSU Sandinama/
Wulet lir tamPAR lungit Kitab Suci/
Lanyo-laNYO kumowantun,
KekirangAN mayuta/
Ingkang kaTON sekar rinakit puniku/
Udhu waNI kurang duga/
Paring wuwUS kula tampi//
Sumber & inspirasi: Wahyu 16:1-21
Sor Blimbing nalikané
Malem Jemuah Kliwon, 15102020.
Ki Sandinama
