1. Ngadhang tutupe tahun Liturgi/
Riyadi gung Risang Kristus Nata/
Seminggu andungkap Adven/
Punika Injilipun/
Santo Lukas ingkang kapethik/
Lelampahane begal/
Ingkang nguwuh-uwuh/
Setunggale ngundhamana/
Kang setunggal nglenggana ngasih-asih/
Ngakeni Kristus Nata//
2. Padha ngadeg lan moyoki Gusti/
Sru celathu tanapi nyenyamah/
Tulungana kowe dhewe/
Liyan wae ditulung/
Yen sayekti piniji Gusti/
Prajurite nyenyamah/
Caos cokak kecut/
Alokira kanthi sora/
Yen to kowe nyata Ratu Yahudi/
Saka salib mudhuna//
3. Ndhuwure mustaka dalem Gusti/
Kang tinulis ana tetembungan/
Iki Yahudi Ratune/
Basa seratanipun/
Yunani Latin lan Hibrani/
Salah sijine begal/
Kang sinalib matur/
Kowe iku Sang Mesias/
Tulungana awakmu lan aku ugi/
Begal liya wangsulan//
4. Kowe kuwi ora wedi Gusti/
Aku kowe diukum wus murwat/
Ngundhuh wohing pakartine/
Nanging pawongan iku/
Tindak tanduk tembung utami/
Mring Gusti aturira/
Ngrerepa nyenyuwun/
Yen rawuh jumeneng Nata/
Ngengetana kula Gusti ngendikani/
Myang Pirdus sira nunggal//
Sor Blimbing, Riyadigung Kristus Nata,
24.11.2019
Inspirasi Lukas 23: 35-43
Ki Sandinama
