Kidung Kusumaning Bangsa – Pangkur

1. Sakpungkur dina mardika/
   Sanga September tumapake ari/
   Britania Agung dhawuh/
   Anyebar wara-wara/
   Surabaya sigra nungkula lan tundhuk/
   Pasrah gaman lan pawongan/
   Kang nyidra Malaby wingi/
2. Bung Tomo sesorahira/
   Ngobarake semangat mudha-mudhi/
   Aja gelem nglumpruk nungkul/
   Ora mundur sejangkah/
   Nadyan prapteng pecah dhadha muncrat marus/
   Dhadhagana kamardikan/
   Segelar sepapan wani//
3. Sepuluh Nopember dina/
   Surabaya dadi segara geni/
   Britania ngamuk punggung/
   Taruna tangkep jaja/
   Bebantene tan kaetang gunggungipun/
   Akeh mati tanpa aran/
   Dadi kusumaning nagri//
4. Nembelas Desember rinya/
   Siji sanga seket sanga ing nguni/
   Kanthi Kepres nomeripun/
   Tigangatus nembelas/
   Saben sedasa Nopember dipunputus/
   Dina Kusumaning Bangsa/
   Kang sampun labuh negari//
5. ANcase kidung punika/
   TONjokane ‘tur kusumaning nagri/
   NILar sanak bapa biyung/
   USada Nusantara/
   SUpaya gung lana kamardikanipun/
   PARanipun mugi Swarga/
   Nyoroh gesang ‘tur pertiwi//

Sor Blimbing, Buda Palguna, 30.10.2019
Ki Sandinama

.