Dhandhanggula
- Ngadhang tutupe tahun Liturgi/
Riyadi gung Risang Kristus Nata/
Seminggu andungkap Advèn/
Injil Santo Matiusl/
Ayaté telung puluh siji/
Kawandasa nem tuntas/
Pasalé selangkung/
Gèmbèl lan bérok pinisah/
Gèmbèl tengen lan bérok ing sisih kering/
Sang Prabu sru ngandika// - Sisih tengen tampanana iki/
Nugraha gung kang sira gegadhang/
Awit nguni nalikané/
Aku luwé korangsum/
Kala ngelak menehi warih/
Ngampiraké wong manca/
Wuda kalanipun/
Sira mènèhi sandhangan/
Nalikané aku kinunjara nguni/
Sira tetinjo teka// - Wangsulané sagung para suci/
Kala napa kula caos dhahar/
Kala jengandika luwé/
Tanapi caos ngunjuk/
Kalané Panjenengan salit/
Kula boten uninga/
Tiyang manca ngenu/
Nalikanira nglegena/
Sartanipun kinunjara duk ing nguni/
Sabdanira Sang Nata// - Sayektiné pangandika mami/
Samubarang kabeh tindakira/
Mring sanak kang papa dhéwé/
Yaiku kanggo Aku/
Lajengira sabdanirèki/
Marang kang sisih kiwa/
Minggata sirèku/
Malbènga geni kang lana/
Tan tumindak kanggo wong papa lan miskin/
Tan tumindak mring Ingwang//
Panutup:
- Suprih pana nami kang sinandi/
Paran sapa aran Sandinama/
Nyobi niteni sekaré/
Samangké papanipun/
Kawaosa purwanireki/
Ngaglah purwané gatra/
Yoga kluyar-kluyur/
Gya pinanggih namanira/
Karo pisan ngendi omahé samangkin/
Taler mung bocah désa//
Inspirasi Injil Matius 25:31-46
Sor Blimbing, ndungkap
Riyadigung Sang Kristus Nata, 22112020
Ki Sandinama
