Novena
M I J I L
- Kang kawiyos panyuwunan mami/ Anoraga nyadhong/
Hyang Roh Suci kersa maringaké/
Sih Dalem sapta nugraha nenggih/ Ndungkap titi wanci/
Péntakostanipun// - Tumedhaka dhuh Sang Hyang Roh Suci/
Lubèrna sih kang rob/
Paringna Roh Kawicaksanané/
Tresna lan nengenaken prakawis/ Kasuwargan jati/
Ing salaminipun// - Rawuha Roh kang sayekti Suci/
Murih saged ngertos/
Rohing budi dimèn ngantepaké/
Mring sagunging piwulang agami/
Mrih sukma lestari/
Mlebet Suwarga gung// - Gya tedhaka Roh Kang Maha Suci/
Pitedah sayektos/
Ngampingana satindak-tanduké/
Tansah mulung lampah ingkang suci/ Nèng margi utami/
Supados rahayu// - Maringana Roh kang anedhaki/
Dimèn tangguh tanggon/
Roh Kasantosan kanggé samangké/
Derapon kiyat kalané manggih/
Mengsah mbebayani/
Boten ngantos kélut// - Gya tedhake Roh Suci samangkin/
Amrih kula ngertos/
Seserepan prekara branané/
Lajengira milah ingkang aji/
Brana Swarga adi/
Ingkang langgeng luhur// - Tumedhaka Roh sungkem mring Gusti/ Mung tresna Hyang Manon/
Mbalung sungsum tandhes myang batiné/ Siyang ratri mung ngupadi Gusti/
Sageda pinanggih/
Kebak tresna tuhu// - Tumuruna Roh ajrih lan asih/
Marang Kang Kuwaos/
Gemeteré ajrih mring Allahe/
Muhung nyawang kaluhuran Gusti/
Tan laku nalisir/
Mrih Gusti tan wuru// - Hyang Roh Suci kersoa nedhaki/
Ngurubna tresnangong/
Kinabulna iki panyuwuné/
Sambat kula mumbul ing wiyati/
Ngarsa Dalem Gusti/
Mangga sami munjuk// - Anoraga kula ngasih-asih/
Roh Suci cumondhok/
Margi saking kawicaksanané/ Jinangkunga palimirmanèki/
Saking Hyang Roh Suci/
Lantaran Sang Kritus//
Panutup
- MAnohara Sandinama wani/
NYObi ngudi batos/
SAbanjuré pasrah sakersa-Né/
KAdereng mung ngolah jiwa iki/
DÉné tan kadugi/
SAkarsa Hyang Agung//
Sumber: Padupan Kencana, Sembahyangan Konjuk Hyang Roh Suci Nyuwun Sih Paring Dalem Pepitu.
Sor Blimbing, 24052020
Ki Sandinama
