Pangkur
- Mungkur nggonmu parisuka/
Ala ketara lan becik ketitik/
Nadyan ginembok binungkus/
Tan wurung kawistara/
Raja brana kang korupsi asalipun/
Suradira jayaningrat/
Lebur déning pangastuti// - Tan mestani sinten ndika/
Urip namung wang sinawang sayekti/
Sepira ta pametumu/
Généa nganglang jagat/
Mubra-mubru lir bumi bakal kokgulung/
Teken janggut suku jaja/
Polahé kawula alit// - Noya-nayo titi mangsa/
Kaya wayang gagah lagi kasimping/
Tancep kayon bali nglumpruk/
Nggléthak tinata kothak/
Mokal obah yèn tan wonten dhalangipun/
Lir curiga manjing rangka/
Aji mumpung haywa kongsi/ - Gusti nyuwun KInabulna/
Numpes tapis lakuné MAlanagri/
Datan kendhat NYObi sampun/
Geng branta ANtepira/
Ora kurang kang diukum TONtonipun/
Awit saking NIlep arta/
Dadia USada dhiri//
Inspirasi: Jeksa negara
Sor Blimbing, 17092020
Ki Sandinama
