Pangkur
- Sapungkur nagri mardika/
Bu Pertiwi tan lepat saking cobi/
Mérong kampuh jingga tuwuh/
Margané tan narima/
Anyawiji Nusantara kumpul kukuh/
Kepara praptèng samangkya/
Arsa ndhongkèl dhasar nagri// - Prahara geng tan kinira/
Sangalas sewidak lima ing nguni/
Latah sinebut Gestapu/
Ariné tigang dasa/
Wulanira September ingkang lumaku/
Bantené kusuma bangsa/
Pahlawané Revolusi// - Sarambut pinara sasra/
Tan ginggang Pancasila dhasar nagri/
Kacihna sakti satuhu/
Oktober ping setunggal/
Pancasila Sakti nenggih arinipun/
Dadia piwulang tama/
Tumbasané urip mati// - Kidungé pisungsungira/
Ingkang katur sekar nagri kang lalis/
Mugi malbèng Swarga Luhur/
Awit geng labuhira/
Nuladha mrih mendhem jero mikul dhuwur/
Yaiku piwulang tama/
Ora mangro tohé pati//
Sor Blimbing, 30092020
Ki Sandinama
